જ્યાં જ્યાં નજર મારી ઠરે

જ્યાં જ્યાં નજર મારી ઠરે યાદી ભરી ત્યાં આપની,
આંસુ મહીં એ આંખથી યાદી ઝરે છે આપની!

માશૂકોના ગાલની લાલી મહીં લાલી, અને
જ્યાં જ્યાં ચમન જ્યાં જ્યાં ગુલો ત્યાં ત્યાં નિશાની આપની!

જોઉં અહીં ત્યાં આવતી દરિયાવની મીઠી લહર,
તેની ઉપર ચાલી રહી નાજુક સવારી આપની!

તારા ઉપર તારા તણાં ઝૂમી રહ્યાં જે ઝૂમખાં,
તે યાદ આપે આંખને ગેબી કચેરી આપની!

આ ખૂનને ચરખે અને રાતે હમારી ગોદમાં,
આ દમબદમ બોલી રહી ઝીણી સિતારી આપની!

આકાશથી વર્ષાવતા છો ખંજરો દુશ્મન બધા,
યાદી બનીને ઢાલ ખેંચાઇ રહી છે આપની!

દેખી બૂરાઇ ના ડરું હું, શી ફિકર છે પાપની?
ધોવા બૂરાઇને બધે ગંગા વહે છે આપની!

થાકું સિતમથી હોય જ્યાં ના કોઇ ક્યાં એ આશના,
તાજી બની ત્યાં ત્યાં ચડે પેલી શરાબી આપની!

જ્યાં જ્યાં મિલાવે હાથ યારો ત્યાં મિલાવી હાથને,
અહેસાનમાં દિલ ઝૂકતું, રહેમત ખડી ત્યાં આપની!

પ્યારું તજીને પ્યાર કોઇ આદરે છેલ્લી સફર,
ધોવાઇ યાદી ત્યાં રડાવે છે જુદાઇ આપની!

રોઉં ન કાં એ રાહમાં બાકી રહીને એકલો?
આશકોના રાહની જે રાહદારી આપની!

જૂનું નવું જાણું અને રોઉં હસું તે તે બધું,
જૂની નવી ના કાંઇ તાજી એક યાદી આપની!

ભૂલી જવાતી છો બધી લાખો કિતાબો સામટી,
જોયું ન જોયું છો બને જો એક યાદી આપની!

કિસ્મત કરાવે ભૂલ તે ભૂલો કરી નાખું બધી,
છે આખરે તો એકલી ને એ જ યાદી આપની!

-"કલાપી"

કેટલાક શેર

દુનિયા તજી દે તું, તને દુનિયા મળી જશે
દુનિયા જો લુંટવી છે, તો દુનિયા લુંટાવી જા
મળતો નથી જો એ તો પછી ખુદ ને ખોઈ દે,
તૂ એની શોધ નો આજે નવો રસ્તો બનાવી જા..
-"આસિમ"

મજા આવી ગઈ'તી, દિપક રાગ ગાઈને સળગવામાં
તમે મલ્હાર છેડીને ભારે વેર વાળ્યુ છે.
-"વ્રજ માતરી"

નથી એક માનવી પાસે, હજી માનવ બીજો પહોંચ્યો
'અનિલ' સાંભળ્યું છે, ક્યારનો બંધાય છે રસ્તો.
-"અનિલ જોષી"

વ્યવસ્થા એમના માટે શું હોય કરવાની,
મહેમાન એવા હતા કે ઉતારા દોડતા આવ્યાં.
-"ઘાયલ"

પલ્લુ તારા તરફ નમ્યાનું તને
મુજને આનંદ ઉંચે ગયાનો છે.
-"મુકુલ ચોકસી"

સાથે ગુલાલ રાખું છું

સાગર ના ઉછળતા મોજા, નો ઉછાળ રાખું છું,
ઠસ્સા ને મારા હું હરદમ જાકજમાળ રાખું છું.

રજની નાં અજવાળાઓ નો રસ ભરું નયન માં
તારાઓ નાં ટમટમવા નો હું ખયાલ રાખું છું.

નાચ નચાવે જીંદગી તો ખુશી ખુશી નાચું છું,
બધી જ લય માં ભળે સરસ, બસ એ જ તાલ રાખું છું

રાહ અમારી ખુદ લઈ ને જાશે મંજીલ સુધી અમો ને
અથવા નવી ખુદ રાહ બનાવવાની મજાલ રાખું છું.

પ્યારું કોઇ મળી જશે ને થશે વાત રંગો ની,
એમ વિચારી સતત સાથે હું ગુલાલ રાખું છું.

પડઘો પડે

એવું પણ બને ક્યારેક કશુ બોલ્યા વિના જ પડઘો પડે,
દિલ માં વસતો ચહેરો ક્યારેક અડવા જતા આઘો પડે.

ઢળતો સુરજ સમી સાંજ માં ગમી જાય એવું બને,
ક્યારેક વળી સુરજ ના બસ ઉગવાથી જ વાંધો પડે.

આશિક દિલ ને માટે આમ તો પૂરતો હોય છે ઈદ નો ચાંદ,
એવું પણ બને કે પૂનમ નો ચાંદો ક્યારેક અડધો પડે.

જીવનરુપી નાટક માં હજુ જામ્યો હોય કોઇ રંગ નવો,
ત્યાં જ અચાનક એવુ પણ બને કે અધવચ્ચે જ પડદો પડે.

મલકાતો ચહેરો

બ્લોગ પર મારી પહેલી ગઝલ પોસ્ટ કરું છું.
---------------------------

ક્યારેક અમસ્તા હું પણ થોડા આપું છુ પ્રત્યાઘાતો,
કારણ છે એનુ કે મે પણ જીરવ્યા છે કૈક આઘાતો.

આમ ભલે ને હૃદય રડે પણ હસતી રાખુ છું આંખો,
તો પણ હરદમ શબ્દે શબ્દે દર્દ રહે છે છલકાતો.

કિસ્મત ને મારે જઇ ને બે ચાર સવાલો કરવા છે,
થોડી શિકાયત કરવી છે, કંઇ કરવી પણ છે રજુઆતો.

નારાજ નથી હું દુનિયા થી એણે તો મુજ ને આપી છે,
દર્દ, નિરાશા, નિષ્ફળતા ની કેવી સુંદર સોગતો.

ઘર ના મારા આયના ને રોજ કરું છું એક સવાલ,
દોસ્ત, કહે કે ક્યાં ખોવાયો ચેહરો પેલો મલકાતો.

---------------------------